Thawng bultan

# Aralaimi thlathum chungah tlangcung hriamtlaibu vialte he kahdohnak ngol ding le hnatlaknak tuah dih ding dirhmun a phan kho ko lai tiah zumhnak kan ngei tiah tlanglawng vuanci Aung Min nih a chim. Atu tiang ah hin hriamtlaibu 16 chungah hin hriamtlai bu 9 hna cu Kawl cozah he kahdohnak ngol dingin hnatlaknak minsen an thut cang. Kachin mipi luatnak bu KIA telh in a dang a tangmi bu 6 he zong a rauhhlan ah hnatlaknak minsen thut dingin ruahchannak kan ngei, Karenni ṭhanchonak party KNPP he aralaimi March 1 ah minsen thutnak kan ngei lai i a dang a tangmi bu 5 zong hi hriamnam chiah dingin timhtuah cia an si tiah Aung Min nih a chim.—RFA

# Tachileik peng chungah rithaisi, bingraang le meithal pawl an tlaih tiah thawng theih a si. Rithaisii sii-mum nuai 8 in nuai 7 lengkai, bingraang 52 kg, meithal Ak-47, M-16, pistol 38 an tlaih hna tiah Tachileik khua palik bawi pakhat nih BBC sinah a chim. Cacawn nikhat ni lioah Tachileik pengchung Lwetawkham timi khua inn pakhat ah rithaisii an chiah tiah thawngpang an theih caah palik nih an va kal hnawh hna i vawlei tangah khur cawh in an rak thuhmi rithaisii le meithal cu atu bantukin an tlaihnak hna hi a si. Mah inn a hngakmi nu pakhat zong an tlaih tiah Tachileik palik nih an chim. Atu bantukin rithaisii le meithal an tlaihnak hmunhma rithaisii he pehtlai in min a chiat taktak nak hmun Shew Triangle timi humnhma ah a si.—BBC

# Thailand ram thawngzamh (media) lei rianṭuannak pakhat a simi BEC-Tero company cu Kawlram Forever Group he hmunkhat ah rianṭuanṭi dingin timhtuahnak an ngei tiah Bangkok Post thawngzamhca nih a ṭial. Forever Group cu atu lio MRTV-4 a thlahtu an si. BEC-Tero company an hruaitu pakhat nih, “company leikap in Kawlram ah rianṭuannak kauh ding hi kumhnih chung timhtuahnak an ngeihnak kong, Kawlram Forever Group he hmunkhat ah rianṭuanṭi a si ahcun TV line thar a simi line number 7 caah TV zatlaan pawl, zinglei News program pawl cu aralaimi April thla canceo ah thawk dingin ruanchannak kan ngei,” tiah a chim.

Mah hmunkhat rianṭuantinak ding caah BEC-Tero company nih share caah zatuak 49%, Forever Group nih zatuak 51% an i tel lai. A dihlak fonh hi zeizat a si cu theih a si rih lo. BEC-Tero company cu Thailand ram BEC World company i an rianṭuannak pakhat a si i Video, TV tbk a thlahtu le a piahtu an si. Ni kum ah Thailand tangka Bath in sing 2800 an hmuh i tukum ah cun sing 3000 kan hmuh lai tiah an ruahdamh.—RFA

Posted in: Thawngbultan