NLD party luhnak catlap sing 5 tluk an zuar cang

NLD Party luhnak (registration) catlap an zuar ni thawk in ni 35 chungah registration catlap sing 5 lengkai an zuar cang tiah NLD nih an chim.

January 9 ah State (ramkulh) le Division (ramṭhen) pawl ah party luhnak catlap cu nuai 1 an phawtzamh cang i February 13 tiang an zuar lai tiah NLD party chungin Onh Kyine nih Irrawaddy sinah a chim. "Party luhnak catlap an zuar cangmi hi a catlap in sing 5 lengkai a si cang. Asinain cazin khawmhsuatnak kan tuah khawh rihlo caah Party luhnak a sawktu minung pa zeizat an si tak cu kan hngal kho rihlo, party luhnak catlap hi tlapkhat ah Kyat 100 a si i a cawmi dihlak hna hi party luhnak ding caah an sawk ṭhan dih ko lai tiah ruahchannak kan ngei, cun catlap a man tak hi Kyat 10 sen man a si. Cucaah mipi nih Kyat 100 pek in meikhangh ding menmen cun an caw bal lai lo," tiah a chimchap.

NLD party registration cu cozah nih theihpi mi le hngalh pimi party ah January 5 ah Pyidaungsuh thimnak commission nih an cohlan hnu thawk in party chungtel luhnak catlap pawl hi Kawlram pumpi ah an zuarnak hi a si. Mah party chungtel sinak caah hin Suu Kyi thawk in Central committee si hna seh, party hlun pawl si hna seh a thar in an sawk dih tiah theih a si.

Atu lio State le Devesion pawl ah party luhnak a sawkmi an karh chin lengmang caah tuthla donghnak zarh chungah party luhnak a sawkmi vialte cazin cu thawngthanh dingin timhtuahnak kan ngei tiah central committee lei in Onh Kyine nih a chim.? Party chungtel sinak caah mah le pengtlang chung cio i NLD zung pawl ah registration tuah ahcun party chungtel ah cohlan colh a si. Tuchun ni tiangah party luhnak a sawkmi minung chungin khirhnak le duh lomi aho hmanh an um rih lo, asinain party luhnak a sawkmi minung pawl kha a dang ramkhelnak party an si le silo ṭhate in NLD nih kherhhlainak a tuah. Abianabia ah party pahnih ah khatlei le khatlei tbk ah ai tel a si ahcun NLD nih ṭuanvo a lak piak lai lo amah tein ṭuanvo ai lak lai tiah Onh Kyine nih a chim.

NLD party chungin an rak chuahmi hna le amah tein a rak chuakmi tbk hna kha party chungtel ah luh a duh ṭhan a si ahcun an sawknak catlap cungah pumpak an tuanbia tawi a ṭial dih hnu ah Tin Oo hruaimi kherhhlainak committee nih an kherhhlai hnu hna ah cohlan an si lai tiah theih a si. NLD party cu 1990 kum thimnak lio ah party thazaang minung nuai 1 tluk an si tiah theih a si.—Irrawaddy

Posted in: Kawlram Thawng