Johan Thawngṭha Chung in Khrih Chung i Nunnak: 13

BAWIPA JESUH KHRIH RAWL

Rev. Lal Pek Lian

Jesuh nih cun a thawh hna i, "Ka rawl cu a ka thlahtu duhnak zulh le a ka fialmi rian liim kha a si." Johan 4:34

Minung kan nunnak ahhin a har bikmi thil pakhat cu mah le mah i tangṭhumhnak nun hi a si. Mah nawl bak a si komi kha anih nawl siseh tiah ti khawh khi miralṭha le miṭhawngmi lawng nih an rak chim khawhmi a rak si. Miralchia hna nih midang nawlzulhnak hi an tuah kho lo. Midermi hna nih fialmi rian hi an liim kho tawn lo. Sihmanhsehlaw kan Bawipa Jesuh Khrih nih cun a thlahtu Pathian duhnak zulh kha a rawl ah aa chiah i a fialmi rian liim kha a duh ngaingaimi a si. Nihin Laimi khrihfami hna nih kan uarmi rawl hi zeibantuk rawl dek a si ve? Pathian duhnak a zulmi rawl hi kan ei awk le kan mipi kan pek ve hna awk a si.

Kannih cu kan rawl hi zei rawl a si kan fiang kho tawn lo. Rawl khengkhat ruang hoi hna ah sining a thlau khomi kan hei si men ko. Kan mawh lo, an rak buai cio ve ko. Esau lebang cu pehang khengkhat ah fa upa a sinak a rak zuar ko (Gen. 25: 29-34). Kan paw a ṭam tuk lio ah rawl (pawngmuk) a lo tukmi lunghlum tete khi hei hmu usih law ṭhawnnak a ngeimi hei si fawn usih law cu lunghlum tete cu changreu ah kan thlen ter ko hnga i kan or a vuai tiang kan hei ei men ko hnga. Asinain kan Bawipa Jesuh nih cun tukforhnak kha a rak tei ko: "Minung hi rawl lawngin a nung kho lo, sihmanhsehlaw Pathian nih a chimmi bia paoh cu a nunnak a si lai," a ti (Maṭ. 4:4; cf. Deut. 8:3). Pathian bia le rawl hi thukpi in an i pehtlai i Pathian duhnak tuah hi rawl bantukin kan duh awk a si. Esau bantukin fa upa sinak zei i a rel lomi bantuk kan si awk a si lo.

Kan caangthimmi a tuanbia kan hun zoh tikah kan Bawipa Jesuh le Samaria minu bia an i ruahnak a peh kha a si i a zultu hna kha khuachung ah rawl an va caw. Ei-awk rawl an hun i ken lio ah Bawi Jesuh nih hi bia hin a leh hna tik ah an khuaruah a har ngaingai. "A konglam zeihmanh nan hngalh lomi ei awk rawl ka ngei," tiah a rak ti hna. Minung kan pumsa nih a herhmi rawl kha Bawi Jesuh nih a chimhmi hna si loin thlarau rawl kan herh tuk ciomi kha a cawnpiakmi hna a si. Kum 12 a ti i Jerusalem biakinn i a tlau lio ah a nu le a pa nih an rak kawl i bia a rak lehmi hna cu: "Zeicadah nan ka kawl? Ka Pa inn ah ka um awk a si ti kha nan hngal lo maw?" (Luka 2:49) tiah a ti hna. A Pa duhnak zeitlukin dah a rak zulh ti ahcun: "Ka Pa, na hna a tlak ahcun hi hrai hi ka ṭhialpiak ko. Sihmanhsehlaw keimah nawl si loin nangmah nawl si ko seh," (Luka 22:42) a rak ti. Zeidang vialte nakin "A Pennak le a ram kawl hmasat," kha kan Bawipa Jesuh Khrih nih a kan fial (cf. Maṭ. 6:33). Hihi Mary nih khan a rak pemh vemi nun a si. Martha kha rawl ah a buai tuk lio ah Mary cu thlarau rawl kong kha hnangam tein Jesuh kehram ah a ṭhu i a rak ngai (cf. Luka 10:38-42). Mary bantukin thil hmaan aa thim thiammi kan si cio ding hi a biapi taktakmi a si.

Posted in: Capar