Seihnam: Avoi 482nk
SEIHNAM: Laitlang chuahnak le Malaysia na phak kum?
Pu Ngun Mang: Ka khua cu Thantlangpeng Vomkhua khua a si. 1996 ah Malaysia ka phan. 2004 December thla ah Laitlang ah ka va tlung ta i 2005 ah Malaysia ka rak phan ṭhan.
SEIHNAM: 'Immanuel Charity Home' min bunh in zohkhenhnak nan tuahmi kong he pehtlaiin a tawinak in na kan chim kho hnga maw?
Pu Ngun Mang: Zu nih a nun a ṭemṭawnmi hna le amah tein a nunnak Pathian lei ah aa pe kho lomi pawl caah tinhbikmi a si. Laimi nih mission rian kan ti i, theihlomi miphun dang Kawl miphun tbk sin ah kan ṭuan i, kan hmaikaa i a ummi kan miphun sin ah mission rianṭuan ding hi a tam tuk ti ruahnak kan ngei. 2006 kum lio zongah CCF ah rak tuah a si. Laimi lam pawngah a rilmi le zule sa nih a tlaihmi ka hmuh hna tikah ka nunnak nih a celh lo i, mah bantuk pawl zohkhenhnak tuahlo awk ṭhalo in kan nun ah a um. I, kanmah CCCM Khrihfa bu zong nih kan miphun zu le sa nih a tlaihmi hna le biaknak lei ah thazaang a dermi chanhchuah ding hi kan i tinhbikmi cu a si.
SEIHNAM: Mah zohkhenhnak chungah minung zeizatdah an kai? Zeitik in dah nan rak thawk i, zeitindah nan zohkhenhning hna a si?
Pu Ngun Mang: Mah ‘Immanuel Charity Home’zohkhenhnak chungah tuhi minung 10 an kai kho i, May 17 ni in kan rak thawk, Zarhthum fai a si cang. Zing/chun/ zan tiin Pathian bia cawnnak an ngei kho.
SEIHNAM: Tu bantuk Camp nan chiahmi hna ah minung rikhiahnak nan ngei maw?
Pu Ngun Mang: Hi zohkhenhnak hi hramhram in mi va dawh kan i tim lo. Hi rianṭuannak cu chikhat ca lawngah kan i tinhmi a si lo. Laimi Malaysia kan um chung ca tiang kan i tinhmi a si. Kai a duhmi nih hi Camp ka um thawk in Pathian lei karhlannak ah ṭhatnak ah a ka hruai lai ti a ruatmi an si ahcun rikhiah loin cohlan an si. Camp i a lut cangmi paohpoah cu a tlawmbik thlathum chung, nupi ngei an si ah tlangval an si ah duh paoh in chuah a ngah lo. Camp chung i a lut cangmi nih Pathian lei ah kanmah tein kar kan hlang kho cang ko lai an ti hlan chung paoh cu um khawh peng ding in timhtuah piak an si. Voidang camping sawhsawh bantuk si loin thlah awk an tlak le tlaklo zoh in thlah te ding ti hi kan i tinhmi a si.
SEIHNAM: Nihin tiang kar nan hlannak chungah hlawntlinnak nan hmuhmi a tawinak in?
Pu Ngun Mang: Pathian dawtnak in kan nau le zong hlawhtlinnak an ngei. Tu zongah mitthli thlak in thla a cammi zong an um. Tehte zong a khang khomi le anmah pumpak hrim in sermon zong zeimawzat a ti khomi an um. I, Pathian nih an nun a thlen hna ti kan hmuh i kan i lawm khun.
SEIHNAM: 'Immanuel Charity Home' dirhnak kong ah bawmchantu nan ngei maw?
Pu Ngun Mang: Aho hmanh bawmchantu an um rih lo. CCCM Khrihfabu hi biapi cu a si ko. Pathian nih mi lungthin ah rian a ṭuan i kan dirhka in minung 13 hrawng nih zing zan eidin ding tbk cu an pek pah hna.
SEIHNAM: Malaysia ram ah rithai-sii a hmangmi (upa/ngakchia) an tam ngai, hi hi zeitin na hmuh ning a si?
Pu Ngun Mang: Si, mah rithai-sii a hmangmi an um pahmi hi lungrethei taktak a si. A ruang cu , kan biaknak a derthawm caah a si tiah ka ruah. Cun, nulepa nih fale chimh cawnpiaknak kan daithlan ruangah a si kan ti khawh fawn. Fale cu nulepa nih an umkalnak hi kan theih hrim hna awk a si tiah ka ruah.
SEIHNAM: Atu lio Malaysia ah Laimi nih kan tonmi chungah zei hi dah a biapi bik in na ruah?
Pu Ngun Mang: Ka hmuh ning ahcun: kan biaknak hi Politic le a pengtlang deuh ah hman kan timh caah hin kan Pathian ai lawm lai lo ti hi ka phan cemmi a si. 1nk ah Pathian kan i bochan ahcun hlawhtlinnak kan hmu lai tiah ka zumh. Pathian bia lei ah i biatak deuh usih. Biana ah, bu thar pakhatkhat a chuah tik zongah a chuak tharmi zong nih a um ṭhingnak bu kha dohnak ah kan hman hna, a ṭhing zong nih soiselnak ah kan hman hna. Bu thar a chuahmi kha a derthawm ahcun a um ṭhingnak bu nih thlazacampi ve ding tihi ka ruahmi a si.
SEIHNAM: Laimi kan i hruainak ah community pakhat le pakhat lungthinkhat tein rianṭuanṭi khawh hi a biapi ngai. Lungrual tein kan ṭuanṭi khawhnak dingah zei lungput dah ngei usih law a ṭha na ti?
Pu Ngun Mang: Bu khat le bu khat lungrual tein rian kan ṭuanṭi khawhnak ding ahcun; Dawtnak le zawnruahnak taktak kan ngeih a herh tiah ka ruah. Lutlai si duh ruangah rian ai khinmi Laimi kan um pah. Hi hi kan hrial a hau. Dawtnak taktak a ngeimi kan si ahcun zei bantuk bu he paoh rian kan ṭuanṭi khawh ding a si. Hnahchuah nun kan ngeih lo ding hi a biapi hringhran.
SEIHNAM: Malaysia Laica chuak pawl na hmuh ning?
Pu Ngun Mang: Laica tein caan hmaan tein ca nan chuah khawh pengmi hrim hi a ṭha tuk ka ti lengmang. Hlan deuh ah khan cun mipakhat nih mah pumpak laar duhnak deuh ah a rak hmangmi an um pah. Kan Laica tein nan chuahmi Cazual 3 renglo a um ve cang tikah miphun dang hmai ah kan za ngai tiah ka hmuh. Ca nan chuah tik tu ah edit tu ṭha deuh in kan zuam piak ulaw ṭha tuk hnga.
SEIHNAM: SEIHNAM tawlreltu sin ah na siaherh bia tlawmpal in:
Pu Ngun Mang: Keimah lei cah duhmi cu; Seihnam hi kap tampi in rian a ṭuanmi nan si i hohmanh thleidannak um lo tiin rian nan ṭuan caah a ṭha tuk. Thlacam nenh bu tein ca nan chuah lai tbk ah timhtuahnak ngei kho ulaw ti kan duh piak hna. Laimi caah nan fa lo a lianbik nan si tiah ka ruah. Nan rian hi a biapi tuk mi rian a si i, lungdong loin i zuam peng ko uh tiah biacah kan duh hna.
SEIHNAM: Ramthumnak kal cang ding na si bantukin tulio nan tuahmi zohkhenhnak cung i na siaherhmi a um maw?
Pu Ngun Mang: Atulio kan tuahmi cungah ka sia cu a herh ngai ko. Nain keimah ka mipum cu a kal lai nain ka lungthin, ka ruahnak cu hika ah a um ko. Zohkhehtu ṭha zong an um ko i ka sia a rem ngai ko.
SEIHNAM: Kan biahalnak caan na kan pek caah kan i lawm.
Pu Ngun Mang: Siaherhnak he biaruahnak nan ka ngeihmi cungah kai lawm tuk ve.
Posted in: Itonnak
5 Careltu Hmurka:
PuNgunMang Ram-3 nak a kal lai te ah SEIHNAM nih mah ban tuk te in sia herh nak nak le miphun zawn ruah nak in Biaruah nak nan ngeih mi le a ruahnak,a hmuh/ton mi le kan lai mi ca-ah a sia herh nak bia a kan cah tak mi hi sullam angei tuk i man ngei tuk ah ka hmuh ve i mah ban tuk ruah nak le mah le miphun ca i zawn ruah siaherh nak lung thinput hi ngei kho cio hna u si ti i thlacam bu in -
lawmh nak tampi he - SuiCung TlangLian,Indianapolis.
A tu Ngunmang hi Mi hrok hrawl, puaisa, mi hlenhmang pa kha maw...
Anonymous na post Comment ka hmuh i kalawm . Asi khawh ah cun hrawk hrawl lo tein mipi theih ding in na lai min le nakhua hi van chim law ka lawm ko hnga. Kan Chinmiphun cung i kan hlen mi an um a si ah cun pathian min in alet hra in ka cham hna lai .Cucu kan miphun hmai le ka zumh mi ka pathian hmai ah bia kai kam.Atu ka um nak,
Austrilia,
melbourne
cont:0421968816
Dear Seihnam reltu miphun hawi dihlak,
Minung hi mizei hmanh a tlamtlingmi kan rak um lo ti cu zapi nih i fian cio a si. Tubantuk in mipakhat nih comment a vun tuahmi zawn ah pumpak hnursawnnak a um tikah—hi hi a ṭha lo taktakmi ruahnak a si. Mi pakhat cung i kan lungfahnak maw, asiloah kan i theihthiam lonak pakhatkhat ruangah mipi hmai, min langhter ṭung lo i ralṭha ngai in bia dawhlo chim hi cu a ṭha lo ngaingai. Pumpak kan tlamtling lonak i thlir cio ahcun mizei hmanh a tlingmi kan um hrim lai lo.
Seihnam website a reltu sin ah zaangfah kan in nawl duhmi hna cu:Tubantuk bia dawhlo le pumpak hnursawnnak ca/bia hi cu a si khawh ahcun comment i pek lo ding in.
Seihnam reltu upatnak he,
thing thei cu a hmin lio ah cun ei duh cio si i a cheh in an vun cheh phuk tawn ko a hang hna luang phut in asinain an vun ei tik ah athawt nak cu theih c i diariamh hlei ah paw akhim ko
Post a Comment