Thinlung Hlautu ‘NUDAWT’

Kan hnuzarh a peh...

A facebook cahmai cu ka vun kau i amin le a hmanthlak cu ka vun zoh. Amin cu ka thluak lawng hmanh si loin ka thinlung nih by heart in a zah colhmi ko khi a lo. Ka kut nih zeikar ah mouse a hmet manh hmanh theih hlah... a rak add colh diam cang ai. Arian dinhni a si ve i facebook a rak online liote a si ve. Hawikom sidingin ka hei add mi cu a ka accept. Chatting in theihternak kan i tuah. Ka thintur nih ka caṭialmi atu le atu a ka palhter. Um.. zeisi hmanh theih duhmi he vun i theih cu lunghmui ko. Atu kan chan hi IT chan tiah an au pi lengmangmi hi kan hmuhtonmi nih el awk ṭha loin ka nun ah a hong lang. Kan vawleipi sining a thleng khotu, US ram mirum bik 14nk, Mark Zuckerberg (kum 27), $17.5 billion a ngeimi, Facebook siamtupa cung ko ah ka lunglawmhnak a sang khun. Daniel pa le chan i nungak len a harning ko kha ka mittlam a cuang ṭhan. Ningzah pangmi tlangvaal cheukhat le bang hna cu nungak an rak leng ngam tawn lo. Inn khat in tlangvaal rak ṭhut cio a si tikah an vun capo hna caan ah an thisa nih a rak celh lo i nungak len hi a rak har hringhran. Daniel pa nih a chan lio (ai cheih saling caan) i nungak a ngeihmi zat a ka chimh tawn ahhin a kutdong cu a thluk luaimai tawn nain, Daniel pa hawi, Tlirh Erh (36) chim tawnnak ah, Daniel pa hna cu D Key thlaih hmanh thiam lomi azei nungak nih maw an uar lai kan chan lio ah cun ka rak lan tukmi dawh a si cuh, tiah ai nek ngai vemi khi a si. Kawl tlawng bia le tipil bia ti ṭheo si dawh an si ve ko hih. Vawlei cung ram hna lakah sifah lei ai tel vemi Kawlram, Kawlram chung hmanh ah sifakbik ramkulh tiah an timi kan Lairam zong Mark nih a fimthiamnak in a tuahmi Facebook nih a luan hnawh ve cang i nungak tlangvaal i theihhngalhning, i len kaining, i hawikomhning hi thilfawite a hong siter ve cang. Global tilian nih a fenh cuahmah chan chungah a ummi keimah le Nu Dawt hna zong kan chan nih hawikom thar ah fawite in kan ser.

A liam lengmangmi caan nih thilung khuaruahnak zong a liam pi ve bangin thinglung chungah thilthar hi a chuakter lengmang ve. Cuticun caan nih kan i theihnak le kan i komhnak cu a liampi i thlakhat renglo a ti ve cang. Khat le khat kan i theiniam ngai cang. Rainṭuan tha tit par ah zaanṭim pakhat le cheu tiang ṭhut hi aho hmanh nih an ka hne kho lai lo, Kawlralkap hmanh nih an ka fial kho ti lai lo tiah ka chim tawnmi cu Nu Dawt he ca i kuat caan ah cun zanṭim sml 3am a ti hmanh hi ka thei manh tawn lo. Nu Dawt hi mi thinlung ṭha, mi thinlungnem a si i zanṭim sml 3 tiang hna ca kan i kuat thaizing ahhin ka ruah tawnmi cu, ka hmai khah lo kuat hna in maw a ka kuat hnga, hi tluk rianṭuan tha dit par ah zanṭim tiang it lo um hi a fawi ṭung lo tiah keimah le keimah bia kai hal lengmang tawn. Nu Dawt hi micungah ṭhatnak tuah ai zuam pengmi a si lawng si loin mi toi ah ai dormi ngaimi, zumhawk tlak nu a si tiah keimah lawng nih ka timi siloin a hawikom dang pawl zong nih an tlaihchan, an uar, an fak ngaimi nu a si. Nu Dawt bia ko nihhin a caan ah cun ka thinlung hi niceu hmanh a hmu lomi thonginn chungah a hrenmi khi a lo tawn, nain, ruahnak thar, thazaang a petu a si ka thinlung nih el awk ṭhalo in a theih. Capo seih zong a thiam ngai fawn. Keimah lawng ka um lio caan zongah a capo chimmi ka ruah tawn ahhin dang huahmah in nih kan hmang. Tlirh Erh nihhin 75% lawng na si ko hih tiah sawi thah in a ka thah deng tawn.— Pehṭhan ding...

Posted in: Lenhloi